Aftershocks sa Sultan Kudarat, pumalo na sa 565

Umabot na sa 565 aftershocks ang naitala sa bayan ng Kalamansig, Sultan Kudarat matapos ang malakas na lindol noong 20 Enero 2026, ayon sa Philippine Institute of Volcanology and Seismology (PHIVOLCS).

Ayon kay PHIVOLCS Director Teresito Bacolcol, 28 sa mga pagyanig ang aktuwal na naramdaman ng mga residente. Pinakahuling naitala ang isang magnitude 3.2 na aftershock kaninang umaga ng 21 Enero, na muling naramdaman sa Kalamansig.

Nauna nang naitala noong 20 Enero ang magnitude 4.2 at 4.4 na aftershocks, na umabot sa mga bayan ng Lebak, Tacurong City, at Pres. Quirino.

Wala namang inilabas na tsunami alert, ngunit patuloy ang mahigpit na pagmamanman ng PHIVOLCS sa sitwasyon. Sa ngayon, wala pang ulat ng malalaking pinsala sa mga gusali at imprastruktura.

Pinapayuhan ang publiko na manatiling alerto at maging handa sakaling magkaroon pa ng mga susunod na aftershocks.