Ilalabas na sa susunod na linggo ang mga subpoena laban kina Senador Jinggoy Estrada at dating senador Ramon “Bong” Revilla kaugnay ng magkahiwalay na reklamong plunder na inihain laban sa kanila kaugnay ng anomalya sa flood control projects, ayon sa Department of Justice (DOJ).

Kinumpirma ito ni DOJ Prosecutor General Richard Fadullon, na nagsabing, “This coming week, we will be issuing the subpoenas already in connection with those cases, meaning to say the preliminary investigation against them will begin.”

Ayon naman kay DOJ spokesperson Polo Martinez, naghain ang National Bureau of Investigation (NBI) ng magkahiwalay na reklamong plunder sa DOJ laban kina Revilla at Estrada.

Dagdag niya, nagsagawa ang NBI ng fact-finding investigation katuwang ang mga piskal, na humantong sa rekomendasyon o referral ng mga kaso sa Office of the Ombudsman. Ang nasabing tanggapan ang siyang nagsusuri kung may sapat na ebidensiya upang ituloy ang kaso.

Sinabi rin ni Fadullon na kakarating lamang muli sa DOJ ang mga rekord matapos ibalik ng Office of the Ombudsman.

Mas maaga, itinanggi ni Revilla ang anumang pagkakasangkot sa mga umano’y “ghost” o hindi umiiral na flood control projects sa Bulacan, matapos maisama ang kanyang pangalan bilang respondent sa dalawang reklamong inihain sa DOJ.

Mariin at tahasang itinanggi naman ni Estrada ang mga paratang ng dating Department of Public Works and Highways (DPWH) Bulacan 1st District Assistant Engineer na si Brice Hernandez, na umano’y tumanggap siya ng kickback mula sa flood control projects.

Nilinaw ni Martinez na ang mga kasong plunder laban kina Revilla at Estrada ay “hindi localized sa Bulacan.”

“On the plunder case, the amounts involved encompass not just projects in Bulacan but nationwide. Hindi localized sa Bulacan,” ani Martinez.

Samantala, kaharap din ng hiwalay na reklamong plunder sa DOJ si dating Ako Bicol party-list representative Zaldy Co, na itinuturing ding isa sa mga pangunahing personalidad sa isyu ng flood control anomaly. Isinagawa ang preliminary investigation sa reklamo laban kay Co noong 05 January.

Noong Biyernes, naghain ang Office of the Ombudsman ng mga kasong graft at malversation laban kay Revilla, kina dating DPWH Bulacan Assistant District Engineers Brice Hernandez at Jaypee Mendoza, at apat pang iba kaugnay ng umano’y P92.8-milyong ghost flood control project sa Pandi, Bulacan.