Posibleng nasa labas na ng bansa ang takas na gambling lord na si Atong Ang, ayon sa whistleblower na si Julie “Dondon” Patidongan, na matagal nang sumusubaybay sa kaso ng mga nawawalang sabungero.

Sa isang panayam sa radyo noong Sabado, sinabi ni Patidongan na naniniwala siyang nasa ibang bansa na si Ang, na kasalukuyang may warrant of arrest kaugnay ng kasong kidnapping with homicide ng mga mahilig sa sabong.

“Sa tingin ko, nasa ibang bansa na siya,” ani Patidongan, at idinagdag na si Ang ay “hindi ordinaryong tao.”

“Internasyonal ang kanyang grupo,” dagdag pa niya.

Sinabi rin ni Patidongan na posibleng umalis na ng Pilipinas si Ang noong Disyembre pa at kung sakaling nasa bansa pa siya, naniniwala siya na maaaring nagtatago ito sa isa sa maraming eksklusibong ari-arian nito.

“Kung nandito pa siya, malamang ay nasa isa siya sa mga eksklusibong subdivision na pag-aari niya o ng mga taong pinagkakatiwalaan niya,” aniya.

“Para sa akin, nag-o-operate siya nang mag-isa at hindi siya nagtatago sa ilalim ng mga heneral o kung sino man. Kung magtatago man siya, sikreto lang niya iyon,” dagdag pa niya.