Luxury vehicles, inutang lang daw sabi ni Discaya

Iginiit ng kontrobersiyal na kontratistang si Pacifico “Curlee” Discaya na ang mga luxury vehicles na kinumpiska ng Bureau of Customs (BOC) mula sa kanyang pamilya ay nakuha sa pamamagitan ng utang at hindi umano bunga ng katiwalian kaugnay ng isinasagawang imbestigasyon sa flood control controversy.

Ginawa ni Discaya ang pahayag sa gitna ng patuloy na pagsisiyasat sa mga alegadong anomalya sa mga proyekto ng pamahalaan sa flood control. Aniya, mali ang pananaw ng publiko na ang kanyang pamilya ay may labis na yaman.

Ayon kay Discaya, ang mga sasakyan ay binili nang hulugan at nananatiling mga obligasyong pinansiyal, hindi patunay ng ill-gotten wealth. Dagdag pa niya, ginamit umano ang mga sasakyan upang magpakita ng kredibilidad sa negosyo.

“Sabi nila ang yaman daw namin. Sa totoo lang, utang nga ’yan eh. Wala kaming sasakyan na luxury na hindi utang,” ani Discaya.

Kinuwestiyon din niya ang dahilan ng pagkumpiska ng BOC sa mga sasakyan, at iginiit na kung nasamsam na ang mga ito, dapat umano itong ituring na kabayaran o restitution sa pamahalaan.

Sinabi pa ni Discaya na ang mga sasakyan ay binili sa “good faith” mula sa lokal na car dealer na si Edward Fuentebella. Aniya, wala silang direktang partisipasyon sa importasyon dahil wala silang kinakailangang lisensiya para rito.

Tinukoy rin ng kontratista kung bakit siya umano ang sinampahan ng kaso habang patuloy na nakapag-ooperate ang dealer na nagbenta ng mga sasakyan.

Nauna na ring sinabi ni Discaya na ang pagbili ng mga luxury vehicles ay ginawa umano batay sa rekomendasyon ni Quezon’s 3rd District Rep. Reynante Arrogancia.

Iminungkahi rin niya na ang lifestyle checks at pagkumpiska ng mga sasakyan ay bahagi umano ng mas malawak na galaw sa pulitika. Binanggit niya na ang kanyang asawa na si Sarah Discaya ay tumakbo laban kay Pasig City Mayor Vico Sotto noong nakaraang halalan ngunit natalo.

Ayon pa kay Discaya, ang kanyang pamilya ay ginagamit umano bilang “sacrificial lambs” upang ilihis ang pananagutan ng mas matataas na opisyal na sangkot umano sa maling paggamit ng pondo para sa imprastraktura. Nanawagan siya ng patas na pagtrato at binanggit na may ilang pulitiko rin umanong kliyente ng parehong car dealer at kilalang gumagamit ng luxury vehicles.

Hindi bababa sa pitong luxury vehicles ang kinumpiska ng BOC mula sa pamilyang Discaya, na nananatiling nasa sentro ng flood control corruption scandal.