Unprogrammed appropriations sa 2026 budget, idulog sa Korte Suprema — Erice

Nanatiling desidido si House Senior Deputy Minority Leader Edgar Erice na isampa sa Korte Suprema ang usapin hinggil sa pinagtibay na unprogrammed appropriations sa ilalim ng panukalang 2026 national budget.

Ito ay sa kabila ng pag-veto ni Pangulong Ferdinand “Bongbong” Marcos Jr. sa P92.5 bilyong halaga ng tinatawag na unprogrammed appropriations.

Sa isang panayam, iginiit ni Erice na labag sa Section 22, Article VII ng Saligang Batas ang ganitong uri ng pondo dahil kinakailangang malinaw at tiyak ang pinagmumulan ng badyet bago ito magamit para sa mga gastusin ng pamahalaan.

Tinukoy rin ni Erice ang naging desisyon ng Korte Suprema kaugnay ng PhilHealth, partikular ang opinyon ni Associate Justice Raul Hernando, na nagsasaad na ang lahat ng anyo ng unprogrammed appropriations ay labag sa Konstitusyon.

Sa ilalim ng panukalang 2026 national budget, ibinaba ang unprogrammed appropriations sa P150.9 bilyon—ang pinakamababang antas nito mula noong 2019.