Inflation rate bumilis sa 1.8% noong Disyembre

Bumilis sa 1.8 porsiyento ang inflation rate, o ang pagtaas ng presyo ng mga pangunahing bilihin at serbisyo sa bansa, noong Disyembre ng nakaraang taon, ayon sa pinakahuling datos ng Philippine Statistics Authority (PSA).

Mas mataas ito kumpara sa 1.5 porsiyento na naitala noong Nobyembre 2025, ngunit mas mababa naman kaysa sa 2.9 porsiyento noong Disyembre 2024.

Sinabi ni PSA Undersecretary at National Statistician Dennis Mapa na pangunahing dahilan ng pagbilis ng inflation ang pagtaas ng presyo ng mga pagkain, partikular ang mga gulay at mga produktong gawa sa arina na karaniwang kinokonsumo tuwing panahon ng kapaskuhan.

Nakaapekto rin umano ang mga malalakas na bagyong tumama sa bansa noong Nobyembre, na nagdulot ng kakulangan sa suplay ng mga gulay, lalo na mula sa mga lalawigan sa labas ng National Capital Region (NCR). Gayunman, umaasa ang PSA na pansamantala lamang ang pagtaas ng presyo ng mga naturang produkto at inaasahang bababa na ito pagsapit ng Enero.

Ipinaliwanag din ni Usec. Mapa na ang 1.7 porsiyentong average inflation rate noong 2025 ang pinakamababa mula pa noong 2016. Dagdag pa niya, ang annual average inflation noong 2025 ay pasok sa itinakdang target ng pamahalaan na 2 hanggang 4 na porsiyento.