Menor de edad na buntis, pinatay ng sariling mister

Patay ang Isang 17-anyos na buntis matapos pagsasaksakin ng kanyang mister sa Sultan Kudarat, Maguindanao del Norte.

Kinilala ni Police Lt. Col. Hector Taño Jr., hepe ng Sultan Kudarat Police, ang biktima na si alyas Hanna na nagtamo ng saksak sa tiyan at maging sa mukha.

Agad namang naaresto ang 21-anyos na suspek na si Akmad Abag at nakuha sa kanya ang kutsilyo.

Ayon sa mga kapitbahay, narinig nilang nag-aaway  ang mag-asawa habang nasa impluwensya umano ng droga ang suspek.

Naisugod pa sa ospital ang buntis ngunit hindi na ito umabot ng buhay.

Ayon kay Col. Taño, inamin ng suspek na matagal na siyang lulong sa shabu at marijuana at nakagamit siya ng iligal na droga nang magawa nya ang krimen.