Arestado ang isang 41 taong gulang na lalaki dahil umano sa pagbubugaw sa dalawang babaeng menor de edad na may edad 16 at 15 sa Brgy. Bakakeng Norte, Baguio City nitong Biyernes.

Pumunta ang mga tauhan ng Baguio City Police Office (BCPO) Station 10 sa lugar kung saan naroroon ang suspek upang ipatupad ang isang search warrant na inisyu ng korte sa parehong araw.

Sa operasyon, nakumpiska ng mga awtoridad ang iba’t ibang kagamitan ng suspek, kabilang ang isang router, desktop computer, mga cellphone, kamera, card reader, mga SD card, flash drive, at hard drive.

Isang kaso para sa paglabag sa Anti-Online Sexual Abuse or Exploitation of Children at Anti-Child Abuse of Exploitation Materials ang isinasampa laban sa suspek. Kasalukuyang nasa kustodiya ng pulisya ang suspek, habang ang mga biktima ay nasa pangangalaga ng nararapat na ahensiya ng pamahalaan para sa kinakailangang interbensyon.

Bukod sa mga tauhan ng BCPO Station 10, nagbigay din ng mahalagang tulong ang Regional Anti-Cyber Crime Unit–Cordillera sa pag-aresto sa suspek. Tumulong din ang mga opisyal ng Barangay Bakakeng Norte at nagsilbing mga saksi sa operasyon ng pulisya, alinsunod sa Standard Operating Procedure (SOP).