Apat katao ang nasawi at higit sa 30 ang sugatan sa naganap na karahasan sa isang bilangguan sa Ecuador noong Linggo.

Ayon sa mga otoridad, ginamitan ng baril at pampasabog ang naturang insidente. Ipinaliwanag nila na ito ay bahagi ng serye ng sunod-sunod na kaguluhan sa mga bilangguan sa nasabing bansa.

Ang mga bilangguan sa Ecuador ay nagsisilbing mga “operational center” ng mga magkalabang sindikato ng droga. Mahigit 500 bilanggo na ang napatay sa mga labanan ng mga grupong nagtutunggali para sa kontrol ng kumikitang ngunit ilegal na kalakalan ng droga.

Ang pinakabagong insidente ay naganap bandang alas-3:00 ng madaling araw sa isang bilangguan sa Machala, isang lungsod sa timog-kanlurang bahagi ng bansa.

Ayon sa mga residente sa paligid, narinig nila ang mga putok ng baril, mga pagsabog, at mga sigaw mula sa loob ng mga pader ng bilangguan.

Naglabas ng pahayag ang SNAI, ang ahensiya ng pamahalaan na nangangasiwa sa mga bilangguan sa Ecuador, na nagsasabing apat na tao ang namatay sa karahasan habang 33 bilanggo at isang pulis ang nasugatan.