Tanod, patay matapos mabagsakan ng sanga ng puno

Nasawi ang isang barangay tanod matapos mabagsakan ng malaking sanga ng puno sa pananalasa ng bagyong Tino sa Panglao, Bohol.

Kinumpirma ito ni Dr. Anthony Damalerio, hepe ng Provincial Disaster Risk Reduction and Management Office ng Bohol.

Ayon sa opisyal, nagsasagawa ng pruning ang biktima nang mabagsakan siya ng malaking sanga ng puno na kanyang mismong pinuputol.

Ang biktima ay miyembro ng isang team na binubuo ng tatlong tanod nang mangyari ang aksidente.

Aniya pa, ang Office of Civil Defense Region 7 ay bine-verify pa kung ang insidente ay direktang sanhi ng bagyong Tino.