Single mom, patay sa kamay ng karelasyong pulis

Nauwi sa pagkasawi ng isang single mother ang pagtatalo nila ng kanyang lihim na karelasyong pulis sa Brgy. Matab-ang, Talisay City, Negros Occidental.

Ayon sa pulisya, nasa loob ng sasakyan ang 42-anyos na biktimang si Kristine Joy Dignadice at ang suspek na si Bacolod City Police Staff Sgt. Enrique Gonzalago Jr. nang magkaroon sila ng matinding pagtatalo.

Tinangka ng biktima na kunin ang kalibre 9mm na baril na nakalagay malapit sa handbrake ng sasakyan, ngunit nagawa itong agawin ng suspek at maiputok. Sa takot, itinapon ng suspek ang katawan ng biktima sa isang tubuhan at dinala sa ibang lokasyon ang sasakyan upang ilihis ang imbestigasyon.

Makalipas ang tatlong araw, sumuko ang suspek sa mga otoridad at inamin ang nagawang krimen.