Maynilad, naglabas ng maintenance schedule sa West Zone

Inilabas ng Maynilad Water Services ang iskedyul ng kanilang maintenance activities bilang bahagi ng regular na pagsasaayos at pagpapanatili ng maayos na kundisyon ng kanilang distribution system sa West Zone.

Ayon sa water concessionaire, kadalasang maliliit na lugar lamang ang naaapektuhan ng mga aktibidad na ito.

Tiniyak din ng kumpanya na isinasagawa ang karamihan sa maintenance works sa off-peak hours upang mabawasan ang abala sa kanilang mga customer.

Pinapayuhan ang mga apektadong residente na mag-imbak ng sapat na tubig bago ang nakatakdang water interruption.

Sa pagbabalik ng suplay, hinihikayat ang mga customer na hayaang dumaloy muna ang tubig sa gripo nang ilang sandali hanggang sa luminaw ito.