Dalawang pasahero sa NAIA, arestado dahil sa nakabinbing mga kaso

Iniulat ng Philippine National Police Aviation Security Group (PNP-AVSEGROUP) nitong Lunes na inaresto ng mga awtoridad sa paliparan ang isang 36-anyos na Pinay mula sa Bay, Laguna, sa Ninoy Aquino International Airport (NAIA) Terminal 1 Departure Area noong Linggo.

Ang nasabing babaeng suspek ay aalis sana patungong Muscat, Oman.

Magkatuwang na nagsagawa ng warrant of arrest ang Warrant and Subpoena Unit ng Calamba Component City Police Station at NAIA Police Station 1 Aviation Security Unit NCR dahil sa paglabag sa Section 5, Article II ng Republic Act 9165 (Comprehensive Dangerous Drugs Act of 2002), na walang inirekomendang piyansa.

Hawak na ngayon ng Calamba Component City Police Station at Subpoena Unit ang babae para sa legal proceedings.

Isa pang kaso ang may kinalaman sa isang 48-anyos na lalaking Filipino seafarer mula Tayabas, Quezon, na dumating mula South Korea.

Siya ay dinakip sa bisa ng isang bench warrant dahil sa paglabag sa Batas Pambansa Blg. 22, ang “Anti-Bouncing Check Law,” matapos hindi humarap sa isang nakatakdang pagdinig. Nakatakda ang piyansang P30,000.

Ang lalaki ay nasa kustodiya ngayon ng Warrant and Subpoena Unit ng Taguig City Police Station para sa legal proceedings.

Sinabi ni PNP-AVSEGROUP Director Brig. Gen. Christopher M. Abecia na matagumpay ang mga operasyon at patuloy ang kanilang dedikasyon sa pagpapanatili ng seguridad sa paliparan, pati na rin sa paghuli sa mga wanted na indibidwal na maaaring magtangkang tumakas sa hustisya sa pamamagitan ng paglipad palabas ng bansa.