Papanagutin at sasampahan ng kaso ng Presidential Anti-Organized Crime Commission o PAOCC ang nasa 117 katao na naaresto sa isang lending company sa lungsod ng Makati.

Ito ay matapos makatanggap ng mga reklamo ukol sa kanilang mapang-abusong pamamaraan ng paniningil sa utang kagaya ng pamamahiya at pananakot sa kanilang mga kliyente.

Ayon sa imbestigasyon 40% ang lumalabas na interest sa utang kada linggo at kapag hindi ito nabayaran sa loob ng isang linggo doon na magsisimula ang kanilang panghaharass katulad ng pagpapadala ng bulaklak ng patay at ataul, pagpopost ng litrato, pagtetext sa mga kaibigan at kaanak ng mga umutang sa kanila.

Nasa P20,000 hanggang P30,000 ang kanilang pinapautang sa pamamamgitan ng mobile app at marami ang naengganyo umutang dito dahil sa mabilis na proseso.

Napagalaman din na nagpapataw ang mga ito ng hidden fees sa mga kliyente na hindi maipaliwanag.

Kakasuhan ang mga tao na nasa likod nito gaya ng paglabag  sa data privacy act, cyberlibel, harassment at iba pa.