Aminado ang aktres na si Andrea Brillantes na single at happy siya ngayon at marami na rin ang nakakapansin na gumanda at mas naging blooming pa ngayon ang dalaga.

Ayon kay Andrea, nahihilig daw siya ngayon sa mga Korean make-up at baka raw ang nakikita ay ang epekto ng positive outlook niya sa buhay matapos makaranas ng sunud-sunod na kontrobersya nitong mga nagdaang buwan.

“Ewan ko ha, baka bagay sa akin ang Korean make up? Nagko-Korean ako lately,” saad ni Andrea. “Ewan ko kung napapanood niyo ‘yung IG stories ko, ako kasi ang nagme-make up sa sarili ko. And natutuwa talaga ako sa Korean make-up lately so ‘yun ang lagi kong request siguro baka bagay talaga sa akin.”

Wala rin daw siyang karelasyon ngayon at naka-focus muna siya sa trabaho at ilang Negosyo.

“Ang lalaki lang sa life ko ngayon ay si Papa God, I think ‘yun ang nakikita niyong glow sa akin siguro ngayon. Lumalaki ako sa lola ko po and my lola is a Catholic and may pagka-religious talaga siya, so kilala na talaga ang Panginoon matagal na. Kailan lang talaga ako nagkaroon ng deep relationship with God, siguro mga two years ago. Hindi lang talaga ako masyadong ma-post about it. Ngayon lang talaga ako mas nagpo-post para kasing part na siya ng personal life ko and lahat naman po mayroon po ng artista may itinitira at isa po ‘yun sa pinapangalagaan ko kasi ayoko siyang ma-tarnish ng public,” sabi ng dalaga.