Pagpatay sa 14-anyos na mag-aaral kinondena

Mariing kinondena ng Department of Education (DepEd) kahapon ang pagpatay sa isang 14-anyos na batang babae habang sinasagot niya ang kanyang learning modules sa bahay sa Talisay City, Cebu.

Nanawagan rin ang ahensya sa kapulisan at pamayanan na tiyakin ang kaligtasan ng lahat ng mag-aaral sa pagsasama-sama laban sa karahasan.

Hindi dapat matakot ang mga mag-aaral para sa kanilang kaligtasan habang itinutuloy nila ang kanilang pag-aaral, sa bahay man o sa paaralan, ayon sa DepEd.

“Ipinaaabot ng DepEd ang pinakamalalim na pakikiramay sa mga naulilang pamilya, kaibigan, at kaklase ng biktima sa panahong ito ng kalungkutan,” dagdag ng ahensya, ayon sa ulat ng GMA Regional TV Balitang Bisdak.

Sinabi ng DepEd na lubos itong nababahala sa mga kamakailang insidente ng brutal na pagpatay sa mga menor de edad, lalo na sa mga batang babae.

Sinasagot ng biktima ang kanyang learning modules sa Barangay Cansojong nang pilit na pumasok sa kanilang bahay ang isang nakamaskarang salarin.

Nanawagan ang DepEd sa mga awtoridad para sa mabilis na paglutas ng kaso at mabigyan ng hustisya ang biktima at ang kanyang pamilya.

Sinabi ng ina ng biktima na wala siyang alam na anumang pagtatalo na kinasangkutan ng anak at hindi niya alam kung may mga kaaway ang kanyang anak.

Iniimbestigahan ng pulisya ng Talisay ang isang tao na maaaring may motibo sa pagpatay sa biktima at tinitingnan ang pagkakasangkot ng mga kaanak ng menor de edad sa iligal na droga.

Nagpahayag rin si Senate Minority Leader Aquilino “Koko” Pimentel III ng parehong sentimyento at nanawagan sa mga awtoridad na bilisan nila ang pagsisiyasat sa pagkamatay ng dalaga.

“Kinukondena namin ang karumal-dumal na gawaing ito sa pinakamalakas na posibleng termino at nananawagan sa mga awtoridad na pabilisin ang kanilang imbestigasyon upang mabilis na madala ang mga salarin sa hustisya,” sabi ni Pimentel sa isang pahayag kahapon, pag-uulat ng GMA Regional TV Balitang Bisdak.

Nagpaabot din ng pakikiramay ang senador at nag-alay ng panalangin para sa pamilya ng biktima.