Delivery rider arestado sa droga

Inaresto ng mga otoridad ang isang delivery rider dahil umano sa pagbebenta ng hinihinalang droga sa Quezon City at nakuha mula sa kaniya ang mahigit P200,000 halaga ng hinihinalang shabu.

Nadakip umano ang 28-anyos na suspek sa isinagawang drug buy bust operation sa Barangay Commonwealth at ayon sa mga otoridad, Enero lamang nagsimulang magtulak ang suspek.

Nag-ugat ang operasyon ng mga awtoridad matapos magsumbong ang mga concerned citizen sa barangay na may isang bagong pusher sa kanilang lugar.

Nakuha mula sa suspek ang nasa 30 gramo ng umano’y shabu na nagkakahalaga ng P204,000 pero dagdag ng pulisya, higit pa rito ang kayang ibenta ng lalaki.

Patuloy na inaalam ng pulisya kung sino ang nagbabagsak ng droga sa suspek.

Sinampahan na ang suspek ng reklamong paglabag sa Comprehensive Dangerous Drugs Act.