Talagang botong-boto pala ang aktres na si Sylvia Sanchez sa aktor na si Zanjoe Marudo para sa kanyang anak na si Ria Atayde.

Alam kasi ng beteranang aktres na bigay-todo talaga si Ria kapag nasa isang relasyon at ngayon nga ay sinabi niyang malaki ang ipinagbago ng dalaga.

"Ang laki ng pinagbago. Ang laki ng kaibahan. Masaya ako," lahad ni Sylvia. "Kaya ko pino-post kasi gusto ko [siya]. Mabait si Z, ma-respetong bata and gustong-gusto ko siya."

Matatandaang siya rin mismo ang nagkumpirma na nililigawan ni Zanjoe ang kanyang anak na si Ria noong October.

Noong November naman ng tila maging Instagram official na ang dalawa matapos mag-post ng mga ito ng kanilang larawan mula sa Japan trip nito.

Sa kaparehas na buwan rin ay nag-post si Sylvia ng larawan kung saan makikitang kasama ng pamilya Atayde si Zanjoe habang nagdi-dinner.