May isang hiling ang aktres at Popstar Royalty na si Sarah Geronimo ngayong balik entablado siya sa "ASAP Natin 'To."

Nagkuwento rin ang dalaga sa tunay na inspirasyon sa kantang "Dati-Dati" na ayon sa kanya ay naisulat niya dahil sa naramdamang kalungkutan habang inaaalala ang dating simpleng buhay.

Hindi rin niya nakalimutang pasalamatan ang kanyang fandom na "Popsters" dahil sa walang humpay na suporta.

"Medyo natagalan po pero nandito naman po ako. Maraming, maraming salamat po sa muling pagtanggap," saad ni Sarah.

Nang tinanong naman siya kung ano ang kanyang hiling sa darating na kapaskuhan, ang sagot niya ay makasama ang mga mahal sa buhay.

"Alam na ni Lord 'yun, ['yung] makasama ko ang mga mahal ko sa buhay habang buhay — habang ako ay nabubuhay," dagdag pa niya.

Sa katunayan ay noong Hulyo pa bumalik sa nasabing variety show ang singer pero ang lahat ng kanyang performance ay recorded lamang.

Matatandaan noong October 29 ay ibinandera ni Sarah sa kanyang Instagram ang isang open letter para sa kanyang mga magulang, manager, at sa lahat ng mga taong patuloy na nagbibigay suporta sa kanya.