Isang 64-anyos na lola na natigil sa trabaho niyang pananahi ang nakatanggap ng maagang pamasko mula sa Talisay City Police sa Cebu at naiyak ito sa tuwa sa natanggap na mga biyaya.

Naging mapalad na benepisyaryo ng Christmas gift-giving ng kapulisan ang 64-anyos na si Lola Guillerma Labrador mula sa Sitio Ilang-Ilang, Barangay Lagtang.

Mahigit 20 taon nang mananahi sa isang pabrika si Lola Guillerma, at naninirahan ngayon sa nasira niyang bahay sa kasagsagan ng bagyong Odette noong nakaraang taon.

Natigil din si Lola Guillerma sa trabaho nang magkasakit, at pareho ring nawalan ng trabaho ang dalawa niyang mga anak at kahit may iniindang sakit, namamasukan pa si Lola Guillerma bilang kahera sa isang lotto outlet.

Hanggang sa makarating ang kaniyang paghihirap at pagpupursigi sa kapulisan ng Talisay City, sa pamamagitan ng kapitbahay nitong si Janice Hoy.

Nakatanggap ng sewing machine si Lola Guillerma, maliban pa sa grocery items, sa tulong ng Talisay City Chamber of Commerce, Trade and Industry at City Advisory Council.

Sinabi ng hepe ng kapulisan na sisikapin nilang matulungan si Lola Guillerma para maipaayos ang bahay nito.