Pinangaralan nitong nakaraan ang aktres at beauty queen na si Kylie Verzosa bilang "Best Actress of the Year" ng Dubai International Arab Festival Awards o DIAFA para sa kanyang pagganap sa Philippine adaptation ng 2010 South Korean hit thriller na "The Housemaid."

Inanunsyo mismo ng DIAFA sa kanilang social media accounts at ayon pa sa award-giving body, inaasahang dadalo si Kylie sa kanilang award ceremony at rarampa sa kanilang red carpet sa Nobyembre.

"Announcing one of this year's honorees, Actress and Beauty Queen Kylie Verzosa will grace the DIAFA Red Carpet and Awards Ceremony and receive her #DIAFA Award for her outstanding role in #TheHousemaid live November 04 from Dubai," saad ng DIAFA sa post nito.

Siyempre, proud na proud ang talent agency ni Kylie na "Viva Artist" at ipinaliwanag na isa sa mga prestihiyosong event ang DIAFA na kung saan kinikilala ang ilang personalidad hindi lang sa Dubai, kundi mula sa iba't-ibang mundo.

Sabi sa caption, "DIAFA is an annual unique and prestigious red carpet & awards ceremony which honors distinguished personalities from both the Arab and International world, in recognition of their annual achievements and contributions towards committees and society's betterment."

Lubos namang nagpapasalamat ang aktres at parehong ni-reshare ang "congratulatory" posts.

Ang "The Housemaid" ay tungkol sa isang katulong na nasangkot sa "family affair" ng kanyang pinagsisilbihang mayamang pamilya. Tampok rin sa pelikula sina Jaclyn Jose, Albert Martinez, Alma Morena, at marami pang iba.

Samantala, Ang red carpet at awards ceremony ng DIAFA ay mangyayari sa November 4 sa Dubai Creek Harbour Marina sa United Arab Emirates.