VP Sara, out of the country hanggang 31 Hulyo

Sa gitna ng isinasagawang impeachment trial laban sa kanya, lumipad na paalis ng bansa si Bise President Sara Duterte, ayon sa Office of the Vice President (OVP).

"The Vice President has left for an overseas trip," ayon sa opisyal na pahayag ng OVP.

Ayon sa ahensya, bibisita ang bise presidente sa Qatar; United Kingdom; at Netherlands kung saan dadalo ang bise sa isang forum at Filipino community (FilCom) event upang makipag-ugnayan sa mga overseas Filipino at maisulong ang kanilang mga interes.

Iginiit din ng OVP na walang pondong mula sa pamahalaan ang gagamitin sa buong biyahe.

Samantala, kinumpirma ng Palasyo na inaprubahan ang pag-alis ni Sara mula Hulyo 16 hanggang 31.

Gayunman, sinabi ni Palace Press Officer Atty. Claire Castro na kabilang din sa itinerary ng bise presidente ang Germany at Northern Ireland, taliwas sa pahayag ng OVP na tatlong bansa lamang ang bibisitahin nito.

Nilinaw ng OVP na nananatiling handa ang ahensya at si Vice President Duterte na tumugon sakaling magkaroon ng mga emergency.