Nagluluksa ang aktres at komedyanteng si Rufa Mae Quinto dahil sa biglaang pagpanaw ng kanyang asawang si Trevor Magallanes.
Sa inilabas na pahayag sa social media, kalakip ang mga larawang kasama ang mister at ang kanilang unica hija na si Athena, sinabi ng aktres na inaalam pa nila ang tunay na dahilan ng pagkawala ng kanyang asawa. Agad din silang tutungo sa Amerika.
Kaugnay nito, nakiusap ang aktres na iwasan ang pagpapakalat ng maling impormasyon tungkol sa pagkamatay ng kanyang asawa. Respeto at dasal ang hiling niya sa gitna ng kanilang pagluluksa, lalo na para sa kanilang nag-iisang anak.
Tinapos ni Rufa ang post sa isang madamdaming mensahe para sa yumaong mister: “Hanggang sa huli, hanggang sa muli, mahal kita, Trev.”
Noong 2016 nagpakasal ang mag-asawa, ngunit nitong unang bahagi ng taon ay inamin ni Rufa na may kinakaharap na pagsubok ang kanilang pagsasama ni Trevor.
Agad namang bumuhos ang pakikiramay mula sa mga kasamahan ng aktres sa industriya sa pamamagitan ng pagkomento sa kanyang social media post.