Andrea Brillantes tamis-tamisan, lambing-lambingan

May mga bagong bidyo sa X para sa isang pabango kung saan ang bida ay si Andrea Brillantes at ang kasama ay ang kanyang best friend na si Kyle Echarri.

Kilig overload ang mga nasabing tatlong bidyo kung saan mapapanood ang tamis-tamisang galawan at mga lambing-lambingan nina Blythe at Echarri. May behind the scenes videos rin na talagang kuhang-kuha ang hindi maitatangging ispesyal na turingan ng KyleDrea, ang opisyal na portmanteau nina Echarri at Brillantes.

Ang mga tinginan, ang ngiti, ang pag-twirl ni Andrea habang nagsasayaw sila ni Klye, ang mga yakapan, ang paglanghap ng binatang makisig sa dalagang kay ganda na tunay namang humahalimuyak.

May signature scent si Blythe na alam na alam ni Kyle na palagiang ginagamit nito at gustong-gusto ni Echarri ang nasabing amoy, huh!

Ang mga Kahel, tawag sa mga nagmamahal at sumusuporta sa tambalan, siksik, liglig at umaapaw ang kaligayahan dahil all mine to give ang kanilang mga idolo sa pagpapakita kung gaano sila kagiliw at tunay na natatangi na ang friendship nina Andrea at Kyle.

Ang mas lalong nagpapadagdag sa kilig at pag-asa ng mga Kahel, ang katotohanan na pag walang taping o ganap si Kyle, sinisigurado niya na kapiling at kasama niya si Brillantes. Itsurang nagbabantay siya sa mga taping at iba pang aktibidad ni Blythe. May balita pa na mismong sa binatang maganda ang mukha at tindig nanggaling, na every other night, magkasama sila ni Andrea, huh! Ay! Sabel! Galawang pumapaigbig na talaga ito eh! Bakit kasi hindi na lang totohanin ang lahat at aminin na “I am lucky I’m in love with my best friend.”

Malapit na ang pagtatapos ng “High Street” ni Brillantes at kasagsagan pa rin ang “Pamilya Sagrado” ni Echarri. Maraming mga Kahel ang umaasa na susugalan ng Star Cinema ang tambalang ito at sa malapit na hinaharap ay pagtatambalin sa isang pangmalakasang romance movie.

Super deserving ang KyleDrea na magkapelikula at siguradong ang buong Kahel fandoms, sisiguraduhing siksik, liglig at umaapaw ang kikitahin sa takilya ng pelikulang pagbibidahan nina Andrea Brillantes at Kyle Echarri.

Sa ngayon, ipagpatuloy niyo lang Andrea at Kyle, ang tamis-tamisan, lambing-lambingan na yaan! Kilig at happy vibes na siyang tunay at walang halong pambobola at pang-gogoyo.

***

Dalawang magulang sa kasalukuyan ang sinusubukan ang tatag at tibay dahil sa mga kinasasangkutan ng kanilang mga anak.

Ang She Said, He Said dramang pampamilya na ang mga bida-bida ay sina Mrs. Angelica Yulo at ang ating two-time Olympic gold medalist Carlos Yulo.

Worst publicity stunt ang sinagawang punong balitaan kung saan ipinamalas ni Ginang Yulo ang husay ng kanyang acting coach kaya nakakaiyak sa on cue at hindi diretsahang masagot ang mga ipinahayag ni Carlos nung ito naman ang nagsambulat ng kanyang mga saloobin tungkol sa mga naunang ipinahayag ng kanyang nanay.

Si Nino Muhlach, ama ni Sandro Muhlach na diumano ay may ginawang hindi tama ang dalawang independent contractors mula sa Kamuning network, sa pagpupulong sa Senado tungkol sa nasabing kaganapin, hindi nito mapagilang mapaluha sa kahambal-hambal na sinapit ng kanyang panganay na anak. Tumaas pa nga raw ang blood pressure ni master Muhlach matapos ang emotional reveal.

Hindi dumalo ang inaakusahan sa pagpupulong kaya si Senador Jinggoy Estrada, papadalhan ng subpoena ang independent contractors para dumalo sa susunod na pulong.

Hanggang saan pa kaya aabutin ang drama sa totoong buhay ng pamilyang Yulo at Muhlach? Aking mga Chika Diva mambabasa, ano ang masasabi niyo sa mga pangyayaring ito?