Ang brown goddess ng Pilipinas, at mahusay na aktres na si Mercedes Cabral, umaariba talaga bilang kinabu-buwisitang kabit ni Rigor (katauhan ni John Estrada) sa pangmalakasang primetime guilty pleasure ng masa, ang FPJ’s Batang Quiapo.

Sa totoo lang, hanggang ngayon, pinag-uusapan pa rin sa Ekis universe ang literal na bardagulan nila ni Lola Tindeng, ang guerrerang katauhan ni Charo Santos, na talaga namang sumugod sa kanyang tahanan sa Quiapo, at dun na nga naganap ang makatotohanng salpukan nilang dalawa ni Lena.

Kaloka ang sabunutan, ang pagkaladkad, walang patumanggang sampalan, pag sakal ni Tindeng sa kabit na walang konsensya at takot, pati na rin ang pag-umang ni Lena sa kanyang baril, na ang tinapat naman ni Tindeng eh ang kanyang Batangas balisong!

Kay husay ni Cabral at sakdal husay rin ang nag-iisang Charo Santos sa eksena! Grabehan nga ang reaksyon dito sa Ekis at kahit ilang araw na tapos na ang pagtatagpo ng mga babaing palaban, ayaw tumigil ang tiktak ng chika sa tilapia war nina Lena at Tindeng.

Alam mong mahusay talaga si Cabral dahil sa posts sa Ekis, dalang-dala ang mga Batang Quiapo loyalist sa pagka-tuso niya at ang pag-papaawa kay Rigor, na paniwalanhg-paniwala sa pagsisinungaling ni Lena, eh mas lalong nagpapatindi sa ngitngit at suklam sa katauhan ni Cabral.