Bata nakuryente dahil sa saranggolang sumabit sa kawad

Nakuryente ang isang 11-anyos na batang lalaki nang subukan niyang tanggalin ang kanyang saranggola na sumabit sa kawad ng kuryente sa Barangay Pusok, Lapu-Lapu City, Cebu.

Ang walang-malay na bata ay nakitang nakahandusay sa bubong ng daycare center sa Sitio Matumbo.

Nagdulot ng kaguluhan ang insidente na tumawag sa atensyon ng ama ng biktima, tiyuhin niya at isang lalaking kapitbahay na sumugod sa bubong para rumesponde sa biktima.

Sinabi ng ina ng kalaro ng biktima na ilang beses niyang binalaan ang kanyang anak at ang biktima laban sa pagpapalipad ng kanilang mga saranggola dahil sa mga kawad ng kuryente roon, pag-uulat ng GMA Regional TV.

Binalaan rin ng isa pang kapitbahay ang biktima bago siya umakyat sa bubong.

Ang insidente ay nagdulot ng panandaliang pagkawala ng kuryente sa sub-village ng Matumbo.

Rumesponde sa pinangyarihan ang mga tauhan ng Lapu-Lapu City Disaster Risk Reduction and Management Office at isinugod ang pasyente sa Lapu-Lapu City Hospital.

Ayon kay Dr. Debrah Custodio, administrator ng ospital, nagtamo ng second-degree burns ang bata.

Sinabi niya na binigyan nila ang bata ng tamang hydration bago ang kanyang pagsusuri sa laboratoryo.

Nagpasya ang mga magulang ng biktima na ilipat siya sa isang pribadong ospital kung saan siya ngayon ay nagpapagaling.

Batay sa City Ordinance No.16-033-A-2022, ang pagpapalipad ng saranggola ay kinokontrol sa Lapu-Lapu City dahil sa mga operasyon sa Mactan Cebu International Airport.

Nakasaad sa ordinansa na ang mga magulang o legal guardian ang may pananagutan sa paggabay sa kanilang mga anak laban sa pagpapalipad ng saranggola.