Koreano nahulog sa hotel, Tsinay nagbigti

Isang Koreano ang namatay nang mahulog mula sa ikalimang palapag ng isang hotel sa Maynila habang nagbigti naman ang isang Filipino-Chinese na negosyanteng babae sa isang condominium sa parehong siyudad kahapon.

Kinilala ng mga imbestigador ng Manila Police District Police Station 5 ang namatay na Koreano na may apelyidong Lee at 26 anyos.

 Nakita ang kanyang katawan na duguan at nakahandusay sa parking entrance ng Adria Residences sa kahabaan ng Adriatico Street, Ermita dakong 7:55 ng umaga.

Nakasuot si Lee ng puting sando, itim na pantalon, at nakayapak.

Isang saksi ang nagsabing nakarinig siya ng malakas na kalabog mula sa pasukan ng paradahan habang naghahanda ng pagkain sa loob ng kanyang tirahan.

Samantala, ang nagbigting babae ay kinilalang si Stephanie Cha, 47 anyos.

Sa imbestigasyon na isinagawa ni PCMS Boy Niño Baladjay ng MPD Homicide Section, gumamit ng sinturon si Chan, residente ng Room 1108 sa Grand Residences Mansion sa Adriatico Street, para magbigti sa kisame.

Nadiskubre ng kanyang kasambahay na si Melanie ang bangkay noong 12:24 ng umaga nang malaman ng mga awtoridad na si Chan ay na-diagnose na may matinding depression at kamakailan ay tumigil sa pag-inom ng kanyang gamot.

Narinig umano siyang nagsasabi na ang pagpapakamatay ay mas mainam kaysa sa pag-inom ng kanyang gamot.

Sinabi ng iba pang mga saksi na huli nilang nakitang buhay si Chan noong Martes ng gabi, na umalis sa condominium kasama si Melanie at ang kanyang kapatid na babae.

Noong Miyerkules ng gabi, bumalik si Melanie sa unit ni Chan na may dalang pagkain ngunit walang natanggap na tugon matapos kumatok at mag-doorbell.

Dahil sa pag-aalala, kinontak ni Melanie ang kapatid at pareho silang sumugod sa unit. Nang piliting buksan ang pinto, nakita nila si Chan na nakasabit sa kisame.

Nagpapatuloy ang imbestigasyon ng MPD sa pangyayari.