Nagdeklara ng state of calamity ang lokal na pamahalaan ng Iloilo City nitong Biyernes dahil umano sa naitalang maraming kaso ng acute gastroenteritis at cholera.
Inaprubahan ng ng mga miyembro ng Sangguniang Panglungsod ang pagdeklara ng state of calamity matapos maitala ang pitong namatay dahil sa acute gastroenteritis habang may kabuuang 228 na kaso nito sa lungsod.
Walo naman ang naitalang kaso ng cholera.
Samantala, walong water refilling station naman ang ipinasara ng Business Permit and Licensing Office (BPLO), City Health Office at Iloilo City Police Office dahil sa kakulangan ng business permit at mga nakitang paglabag sa batas.
Nitong Huwebes, sa isinagawang water sampling ng City Health Office sa mga water source sa lungsod, anim na barangay ang lumabas na positibo sa E. coli ang pinagmumulan ng tubig.
Ito ang mga barangay ng Rizal Pala-Pala ll, Maria Clara, Esperanza, Rizal Ibarra, Tanza Timaw ll, at Taal.
Sa anim na barangay na nagpositibo sa E. coli ang kanilang pinagkukunan ng tubig ay 22 dito ang nanggaling sa mga balon at bomba ng tubig, habang 17 naman ang nanggaling sa mga refilling station, water vending machines at bathhouse sa lungsod.
Nanawagan naman si Iloilo City Mayor Jerry Treñas sa mga residente sa lungsod na mag-ingat sa mga iniinum na tubig at mga kinakain na pagkain para maiwasan ang gastroenteritis at cholera.
