TRAHEDYA SA DAGAT!

Pitong katao ang naitalang patay habang nasa 24 katao ang nasugatan nang masunog ang isang pampasaherong bangka sa karagatan na sakop ng Real, Quezon nitong Lunes ng umaga.

Ayon kay Polillo, Quezon Mayor Cristina Bosque at Philippine Coast Guard (PCG), lima sa mga namatay ay babae at dalawa naman ang lalaki.

Sabi naman ni PCG spokesperson Commodore Armand Balilo, tatlo sa mga nailigtas ay nasa kritikal na kondisyon.

Base sa ulat ng PCG, may 134 na sakay ang bangka, kabilang ang walong crew members.

Ayon kay Police Major General Rhoderick Armamento, Southern Luzon area police commander, lahat ng pasahero ng bangka ay nakita na.

“’Yung pinakalatest ‘yung bata narecover na ngayon lang, minutes ago. As of this very moment, ‘yung reported na 134 passengers ay accounted na unless na may other reports pa na papasok…kanina isa na lang ang hinahanap natin, narecover na ‘yung bata na eight years old,” saad ni Armamento.

Idinagdag pa ni Armamento na ang mga opisyal ng pulis, lokal na pamahalaan, PCG, at municipal disaster risk reduction and management office ay kasalukuyang nagpupulong hinggil sa insidente.

Karamihan sa mga nasagip ay nadaanan ng mga RORO at dinala sa Real Port habang ang iba naman ay dinala sa Polillo.

Nakita na rin ang kapitan ng bangka na si John Lerry Escareces at kasalukuyang ginagamot sa Claro M. Recto Hospital.

Ayon sa PCG, idineklarang under control ang sunog sa Mercraft 2 bandang 9:33 ng umaga.

Hinila ng MV Triple Ken ang nasunog na bangka sa Baluti Island, Barangay Cawayan sa Real.

Sa ulat ng local government unit ng Polillo, umalis ang Mercraft 2 boat sa isla dakong 5 a.m. at papunta sa Real, Quezon.

Dakong 6 a.m., nag-utos ang kapitan ng bangka na iabandona ang sasakyan dahil nasusunog na ito.

Ayon kay Balilo, nasunog ang bangka 1,000 yards na lang ang layo sa pantalan ng Real.