Bea Alonzo, game sa John Lloyd reunion

Aminado ang aktres na si Bea Alonzo na hindi umano imposibleng magkaroon sila ng reunion project ng aktor na si John Lloyd Cruz na matagal na nilang gustong mangyari, kaya naman ngayon pa lamang ay inaabangan na ng loyal fans nila ang muling pagsasama nila sa isang teleserye o pelikula.

Sabi ni Bea, dream talaga nila ni Lloydie na makagawa uli ng proyekto lalo na nga ngayong magkasama na sila sa GMA 7 at maghintay lamang umano ang mga supporters nila ni Lloydie kapag natapos na ang taping nila ni Alden Richards sa first teleserye niya sa GMA 7 na “Start-Up”.

Kung magtutugma raw ang schedule nila ng Box-Office King ay malaki ang posibilidad na matuloy ang kanilang dream reunion project.

“Lahat ito ay magdedepende pa sa time naming dalawa kung magtutugma at magdedepende pa sa script kung mababasa na ni John Lloyd and if he will agree to doing it,” sabi ni Bea.

“It’s very exciting and nakaka-flatter din kasi kahit na sobrang tagal na naming magkapareha hindi pa rin nawawala ‘yung interes nila sa amin,” dagdag niya.

Samantala, abot-langit naman ang pasasalamat ni Bea sa lahat ng kanyang YouTube subscribers dahil umabot na sa 100 episodes ang kaniyang vlog, na sinimulan niya noong kasagsagan ng COVID-19 pandemic.

“This is very meaningful to me kasi personally minsan lang ako nakagagawa ng mga bagay consistently. And I’m very proud that I was able to do this,” sabi ng dalaga.

Ibinahagi rin ng dalaga ang naganap na event kamakailan kung saan nakasama niya ang ilan niyang fans sa panonood ng kanyang vlogs.

“Siguro ‘yun ‘yung mas pinakamalaking nagawa sa akin nitong vlog. Like nagkaroon ako ng mas malalim na connection and friendship with my fans,” saad ni Bea.