Lolo, patay matapos atakihin sa puso sa vaccination site

Nasawi ang isang matandang lalaki matapos atakihin sa puso habang nakapila para magpabakuna laban sa COVID-19 sa isang vaccination site sa Bulacan.

Ayon sa ulat, pasado alas-2 ng hapon nang maganap ang insidente sa isinasagawang bakunahan sa Malolos.

Sa kanyang salaysay, sinabi ng anak ng biktima na sinamahan niya ang ama para magpabakuna.

Idinagdag nito na wala pang alas-10 ng umaga ay nakapila na sila ng amang si Armando Balite, 64 ng Brgy. Panasahan, Malolos ng nasabing lalawigan.

Pagdating umano nila sa lugar ay agad silang hinanapan ng text message mula sa Resbakuna.

Sinabi pa ng anak na tinawagan sila ng barangay para sa iskedyul ni Balite isang araw bago sila magtungo sa vaccination site.

Nakipagtalo pa umano ang biktima sa isa sa mga nagpapalakad ng bakunahan dahil sa hindi maayos na sistema doon.

Mahigit tatlong oras na nakapila ang biktima nang hindi kumakain.

Nanikip ang dibdib ng matanda at tuluyan nang inatake sa puso.

Mabilis namang naisugod sa pinaka malapit na pagamutan ang biktima ngunit hindi na umabot sa ospital.

Sinubukan namang kunan ng pahayag ang lokal na pamahalaang nakasasakop sa lugar ngunit wala pa silang tugon hinggil sa insidente.