Robredo: Karapatan ng Filipino mamili ng vaccine na gusto nila

Nanindigan si Vice President Leni Robredo na may karapatan ang mga Filipino na mamili ng brand ng Covid-19 vaccine na ituturok sa kanila.

Ito ang kanyang naging tugon matapos na maunang sabihin ni Presidential Spokesperson Harry Roque na hindi dapat maging choosy ang mga Pinoy kung anong gagamiting vaccine para sa kanila para labanan ang virus.

“Dapat siguro ipaalala na iyong kalusugan natin karapatan natin iyon, ‘di ba. Hindi ito isang pribelehiyo na hindi dapat accessible sa lahat pero ito ay isang karapatan na puwede nating i-demand,” ayon kay Robredo sa kanyang radio program sa dzXL.

“Kaakibat doon sa karapatan na iyon iyong karapatang magtanong ano iyong isasaksak sa katawan mo, ‘di ba.”

Giit pa ng opisyal na mas makabubuting ayusin ng pamahalaan ang pakikipag-komunikasyon para maibsan ang takot ng publiko hinggil sa kaligtasan at bisa ng mga vaccines na dadalhin sa bansa.

Anya kung hindi maire-relay nang maayos ang tamang impormasyon hinggil sa mga bakunang ito ay magdadala lang ito ng kontrobersiya, may basehan man ito o wala.

“Hindi nako-communicate nang maayos iyong—may mga statements na sinasabi iyong iba nating mga government officials na hindi nakakatulong,” ani Robredo.

“Whether may basehan iyon o wala, pero ganoon iyong impresyon ng tao na parang may kinikilingan tayo… May pinipili tayo na, parang may isang vaccine na nakakaangat sa iba,” dagdag pa niya.