Bomb sniffing dogs kontra COVID-19

Gagamit na rin ng bomb sniffing dogs ang lokal na pamahalaan ng Antipolo para labanan ang coronavirus disease 2019 (COVID-19).

Ayon kay Antipolo Mayor Andrea Ynares, gagamitin ang mga K-9 dogs para ma-detect ang nakakahawang sakit na ito.

“Matapos po nilang sumailalim sa apat na buwang training, malapit na nating makatulong sa pagdetect ng COVID-19 ang mga alaga nating aso sa lungsod,” pahayag ni Ynares sa kanyang Facebook post.

Ayon sa alkalde, ito ay ginagawa na ngayon sa maraming mga bansa tulad ng USA.

“Magtatalaga muna tayo ng mga trained K-9 dogs sa mega testing (swabbing) facility sa events center (sa likod ng Ynares Center) bago sila idestino sa ibang mga matataong lugar tulad ng ospital, palengke, atbp,” ani Ynares.

Anya, magsisilbing screening test ang mga asong ito bago tumuloy sa pagpapa-rapid test o RT-PCR swab test ang kanyang mga kababayan matapos makuha ang kanilang pagpayag.

Sa kasalukuyan, nasa 3,138 na ang kumpirmadong kaso ng COVID-19 sa lungsod habang nasa 83 naman ang namatay sa naturang sakit at nasa 2,975 naman ang nakarekober.