Kiko Barzaga may dalawang kasong kriminal — DOJ

Kinumpirma ng Department of Justice (DOJ) na ang suspended Cavite Rep. Francisco “Kiko” Barzaga ay may dalawang hiwalay na kasong kriminal. Nilinaw nito ang kalituhan sa mga kaso na tinalakay ni Barzaga nang humarap siya sa DOJ nitong linggo.

Ayon kay DOJ spokesperson Atty. Polo Martinez, nagpunta si Barzaga sa DOJ noong 22 Enero, pero para lamang sa isa sa dalawang kasong nakabinbin. Bawat kaso ay may magkaibang alegasyon.

Unang kaso:
Ito ang binanggit mismo ni Barzaga sa kanyang social media post. Kabilang dito ang umano’y paglabag sa:

• Article 153 (tumults at disturbance of public places)

• Article 155 (alarm and scandal) ng Revised Penal Code

• Batas Pambansa Blg. 880 o Public Assembly Act of 1985

Ikalawang kaso:
Mas mabigat ang mga akusasyon dito. Nakadocket bilang NPS No. XVI-INV-25L-00340, ito ay tumatalakay sa umano’y paglabag sa:

• Article 142 (inciting to sedition)

• Article 138 (inciting to rebellion o insurrection) ng Revised Penal Code, na inamyendahan ng Presidential Decree No. 1834

• Kaugnay din ito ng Section 6 ng Republic Act No. 10175 o Cybercrime Prevention Act of 2012

Ayon kay Barzaga, ang ikalawang reklamo ay kaugnay ng kanyang mga pahayag tungkol sa Mindanao secession at ang rally sa Forbes Park noong Oktubre 2025.

Nagkaroon ng kalituhan dahil hindi nabanggit sa kanyang social media post ang sedition charges. Nilinaw ng DOJ na parehong aktibo at nakabinbin ang dalawang kaso.

Iginiit ni Barzaga na ang mga kaso ay bunga lamang ng kanyang pampublikong pahayag at pakikilahok sa mga protesta. Wala namang karahasan na naganap sa rally.

Noong Oktubre ng nakaraang taon, naalis din si Barzaga sa Army Reserve Force matapos magpahiwatig ng sedisyon gamit ang larawang nagpapakita sa kanya na nakasuot ng unipormeng militar.