Pinangunahan nina Pangulong Ferdinand “Bongbong” Marcos Jr. at Education Secretary Sonny Angara noong Biyernes, 09 January 2026, ang paglulunsad ng Accelerating Governance and Adaptive Pedagogy through Artificial Intelligence (Project AGAP.AI), isang inisyatiba ng Department of Education (DepEd) na naglalayong gabayan at sanayin ang mga guro at mag-aaral sa responsableng paggamit ng artificial intelligence (AI) sa basic education.
Ayon sa DepEd, layunin ng programa na ilagay sa sentro ng AI transition ng bansa ang mga stakeholder sa edukasyon sa pamamagitan ng malinaw na mga framework, pagsasanay, at safeguards upang suportahan ang pagtuturo, pamamahala ng paaralan, at learning outcomes sa gitna ng mabilis na pag-unlad ng teknolohiya. Ipatutupad ang Project AGAP.AI nang paunti-unti simula 2026.
Sa national kickoff ng DepEd Artificial Intelligence Program, sinabi ni Marcos na ang salitang “Agapay” ay nangangahulugang suporta o tulay sa pagitan ng teknolohiya at edukasyon.
Ayon naman kay Angara, ang Project AGAP.AI ay nakabatay sa isang pambansang framework na nakaangkla sa Bagong Pilipinas agenda at sa Quality Basic Education Development Plan. Layunin umano nitong palakasin ang pagtuturo, pahusayin ang pamamahala, at maghatid ng mas maayos na resulta sa buong education system.
Isa sa pangunahing bahagi ng proyekto ang malawakang capacity-building. Sa buong 2026, ilulunsad ng DepEd ang AI Ready ASEAN Philippines, isang nationwide AI training program na target ang hanggang 1.5 milyon katao, kabilang ang humigit-kumulang 1.05 milyon mag-aaral, 300,000 guro, at 150,000 magulang.
Isinasagawa ang pagsasanay sa pakikipagtulungan sa mga lokal na partner, kabilang ang Limitless Lab Organization, SmartCitiesPH, Inc., Break the Fake Movement, CGPH Incorporated, at ASEAN Youth Organization. Ayon sa DepEd, pinopondohan ang programa ng ASEAN Foundation at sinusuportahan ng Google.org.
Saklaw ng training ang mga batayang konsepto ng AI, praktikal na gamit sa silid-aralan, ethics at data privacy, at pagtugon sa mga panganib tulad ng misinformation.
Kasabay ng paglulunsad, lumagda rin ang DepEd sa isang memorandum of agreement sa ASEAN Foundation upang pormalisahin ang kanilang partnership sa pagsusulong ng responsableng at inklusibong AI literacy sa buong bansa.
Inaasahan ding ilalabas ng DepEd ang Foundational Guidelines on the Integration of Artificial Intelligence in Basic Education, na magtatakda ng pamantayan sa responsableng paggamit, proteksiyon sa mag-aaral, inclusivity, at etikal na paggamit ng AI sa mga paaralan.
Kabilang din sa mga plano ang integrasyon ng AI concepts sa basic education curriculum at ang paglulunsad ng AI-focused in-service training modules para sa mga guro sa ikalawang quarter ng 2026.
Ayon kay Angara, libre ang Project AGAP.AI dahil ito ay pinondohan sa pamamagitan ng mga donasyon, at inaasahang higit sa 1.5 milyon guro, mag-aaral, at magulang ang makikinabang. Binigyang-diin din niya na ang AI ay dapat manatiling isang kasangkapan at hindi kapalit ng aktwal na pag-aaral at pagsisikap.