Binabantayan ng Department of Agriculture (DA) ang pagpapatupad ng Manufacturer’s Suggested Retail Price (MSRP) para sa sibuyas at baboy.
Ayon kay Agriculture Assistant Secretary Genevieve Guevarra, nagbigay na ang ahensya ng mga abiso o “love letters” sa mga tindero, lalo na sa mga nagbebenta ng pulang sibuyas na lampas sa MSRP.
Ang MSRP ng imported na pulang sibuyas ay Php 150 kada kilo, ngunit may mga nagbebenta nito ng hanggang Php 200. Ang puting sibuyas na may presyong Php 120 ay karaniwang sumusunod sa itinakdang presyo.
Nagbigay rin ng abiso ang DA sa ilang mga nagtitinda ng baboy na nagbebenta sa presyong Php 20–30 na mas mataas sa MSRP. Ang presyo ng liempo ay Php 370, at Php 330 naman ang kasim/pigue, na karaniwang maramihan ang bumibili.
Ayon kay Guevarra, mabagal umano ang bentahan kaya nagtataas ng presyo ang ilang tindero upang mabawi ang kita. Dagdag niya, karaniwan na ang pagtaas ng presyo tuwing papalapit ang Pasko.
Sa kasalukuyan, ang presyo ng baka ay nasa Php 400–500 kada kilo, galunggong Php 280–330, bangus Php 250, at tilapia Php 150–200. Samantala, bumaba ang presyo ng carrots sa Php 90–100 kada kilo dahil sa sapat na suplay.
Babala ng DA, ang pagbebenta ng mga produkto nang mas mataas sa tamang presyo ay maaaring ituring na profiteering.