Isang "Kasalang Bayan" ang dinaluhan ni Senator Christopher “Bong” Go sa Tahanan Village Park, BF Homes, Parañaque City noong Biyernes, 14 Pebrero.
Nasa 80 na magkasintahan ang nagpakasal bilang pag gunita sa Araw ng mga Puso. Tumayo si Senador Go bilang isa sa mga sponsor ng event matapos imbitahan ng mga opisyal ng Barangay BF Homes.
Sa kanyang talumpati, binati ni Senator Go ang mga bagong kasal at binigyang-diin ang kahalagahan ng pagmamahalan, tiwala, at paggalang sa isa’t isa sa pag-aasawa. “Isang malaking karangalan para sa akin na maging bahagi ng inyong espesyal na okasyon, isang araw na punong-puno ng pagmamahal, kasiyahan, at bagong simula,” ayon kay Go.
Pinayuhan din ng senador ang mga mag-asawa na pagyamanin ang kanilang relasyon at bumuo ng matibay na pagpapahalaga sa pamilya. “Magtulungan kayo sa pagbuo ng isang pamilyang may malasakit, respeto, at pagmamahal — dahil ang matibay na pamilya ay pundasyon ng isang matatag na lipunan.”
Nagpasalamat din si Go sa mga lokal na opisyal, partikular na kay Barangay BF Homes Chairperson Jeremy Marquez, sa pag-organisa ng kaganapan. Binigyang-diin din niya ang papel ng mga pinuno ng komunidad, kabilang si Bicol Saro Partylist Rep. Brian Yamsuan na dumalo rin sa okasyon.